دیلک(آرزو)

قارانلیق دونیالاردان

جانیخانلاری ،

نییه گورموسن ؟!

گونشلر حسرتیندن

داریخانلاری ،

بلکه سئومیرسن ؟!

او نه سورغو ؟

اینان منده

                   داها یوخدور قورخو ،

گل آل قانادلارینا

گوتور آپار منی

                      ایشیقلی دونیالارا دوغرو ... !

آجی خاطیره

لاپ ساده سی

بیلیردیم بیر گون

ال لریمدن اوچاقسان

درین خیاله باتاجاقسان ؛

ایسته سن

گونشه ده چاتاجاقسان ؛

آمما

          بیلمه ییردیم

         آجی دیر

          آجی،

          باهاردا

                       آیریلماق خاطیره سی ... !

حیات یولداشی

سوت گونی 

گل بیر گورشگ ،

سوتی سندن

چوره گی  مندن !

دوز گونی

گل بیر  اوپوشک ،

دوزو سندن

چورگی  مندن !

                                سسله ییم : دوز یئدیگیم

                                                  حیات یولداشی !

قار

قیشین چیلله سی ؛

هاوا قارلیر ،

قارلاییر ،

قار

یاغیر ، یاغیر

                          آغیر- آغیر

هر بیر یئری

                       فار آلیر

سانکی هاوا آغاریر !

قارا قارقا

قاریلداییر:

                       -((قار ،قار ...))

اونو گوزله ییر

قارگولله سی ... !

شاختا بابا

آمان-آمان

قیش چیللسی !

گئجه گوردوم

دووارداکی کولگه لره ،

آتیردیلار

                 قار گوله سی !

بیردن دوردوم

ائله دویدوم ،

یاغیب گئجه

                           بیر آغیر شهریمیزه ،

دئیردین بس

گول قویاجاق ،

شاختا بابا

                        سیرا- سیرا قبریمیزه ؟!

قارانقوش ماهنی سی

قارانقوشام

یاز گونلری گلرم،

سنه یازین  موشتولوغون وئره رم!

بیلیرم پاییزدیر

قیش قاباقدادیر،

گئجه لر اوزوندور

یول لار اوزاقدیر،

داریخما سئوگیلیم

                                    داها داریخما،

قارانقوشام

سوز وئریرم

یاز گونلری گله رم،

گوزلریندن اوپوب

                                       بیر گول وئره رم!

بیر گون پاییزدا

سحر

گونش چیخارکن

ایکی کولگه  ایدیک

جومدوق خالق آراسینا

                                           اینامسیز ، اینامسیز

کیمسه باشا دوشمه دی بیزی !

دوشوندوک

                              سرخوش

                                                ماهنی لارلا  ،

کیمسه  گوردو ده ،  گورمه دی بیزی

کیمسه باسا دوشمه دی بیزی  !

گونش باتارکن

هئیوالی باغچالاردا

قوووشدوق

                        قاناتلاندیق  اوچدوق ،

اینانارکن داها

                              صاباح گونش

                                                           دوغمایاجاق بیزی ... !

یول لار

یول لار یاخین

یول لار اوزاق،

یول لار انسانلاری

                                     انسانلار یئتیریر؛

یول لار انسانلاری

                                    انسانلاردان اوزاق سالیر ،

هر انسان اؤز یوردوندان اوزاقلاشیر

                                                                   یئنه یاخنلاشیر؛

انسانلاری قارا توپراغا  تاپیشیریرلار،

یول لار قالیر

گئجه لر یول لار قارالیر،

یاغیر- یاغیر

                               آغیر – آغیر

یول لاری قار آلیر،

انسانلار گؤزو یول لاردا   قارالیر،

انسانلار گئدیر

                            یول لاردا   ایزی قالیر،

آغلاشماق ، گولوشمک قالیر

                                                   خاطره لر قالیر ...!

داود  اهری